Sabik

Sabik

Francis Morilao

Siya ay namulat na lamang,
Na may kasiping sa kanyang kanan;
Ang sabi ng kasulatan,
Kinuha daw sa kanyang tadyang.

Sa paglipas ng panahon,
Mula nang sa paraiso sila’y lumisan;
Ang pagmamahal ang naging sandigan,
Ng bawat makasalanang nilalang.

At hanggang sa panahon ngayon,
Pagmamahal ang tanging layon;
Ng pusong nagmula sa kahapon,
Sabik sa pag-ibig na tugon.

Mahal kita ang nasasambit na bigla,
Kahit na kailan lamang nagkakilala;
Sadya nga bang ganyan ang tadhana,
Pintig ng puso’y bumibilis na kaba.

O nabubulag lang talaga,
Sa mga matatamis na salita;
Mula sa bibig ng mambobola,
Kaya’t kinikilig itong si dalaga.

Dalaga sa unang tingin,
Dalagang ina kung susuriin;
Madali lang daw landiin,
Ang sabi ng isang taga doon sa amin.

Ilang araw lang ay sinagot na ako,
Sa inbox panay ang i love you;
Mahal na mahal daw talaga ako,
Paanong nangyari pagkat wala pang isang linggo?

Sabik nga ba sa pagmamahal?
O sadyang naho homesick lang;
Mayroon namang anak na dapat pagtuunan,
At kailangang mahalin ng lubusan.

At sa social media ipagkakalat,
Ipagsisigawan hanggang sa mamalat;
Pag-ibig na walang patutunguhan,
Ang tanging laman ay puro landian.

Sino nga ba ako para humusga?
Sa laman ng kahon ko lang naman nababasa;
Pag-ibig daw na kabi-kabila,
Mahal kita ang sabi sa dalawa.

Ano nang nangyari sa kabataan ngayon?
Pagmamahalang nagsisimula sa kahon;
Itatagong pilit na may karelasyon,
At magsisiping sa imahinasyon.

Itong si binata ay talagang madadala,
Kapag si dalaga ay nagpakita na;
Ng maselang parteng dapat ikubli sa madla,
Kahihiyang hindi man lang alintana.

Sabik nga ba sa pagmamahal?
O ibang kasabikang walang dangal?
Tanong na dapat na pag-isipan;
Kailangan nga bang sumugal?


Iba Pang Babasahin:

Tungkol kay Francis Morilao

Nagsimula bilang si Makatang Kiko ng Mga Kathang Isip ni Kiko sa mundo ng blogging.
Home About Me! Contact Me! Read More Tula! View my Designs!


Creative Commons LicenseSabik is licensed under a Creative Commons Attribution-NoDerivs 3.0 Unported License. Based on a work at Mga Tula ni Francis Morilao. Permissions beyond the scope of this license may be available at the site's Permission Page.